ઝરણું ઝાંઝરિયું

ઝરણું ઝાંઝરિયું

ઝરણાને ઝાંઝર પહેરાવ્યું

ઝણઝણ કરતું જાય,

ઝરણું ઝાંઝરિયું.

આકાશી હૈયે જે બાંધ્યું

અમરત ત્યાં વેરાય

ઝરણું ઝાંઝરિયું.

વાદળની વાતોથી ભરિયું;

આભતણી આંખેથી સરિયું;

પથ્થર,ભેખડ, પહાડ કૂદાવી

કલકલ મીઠું ગાય

ઝરણું ઝાંઝરિયું.

બુંદ બુંદને જોડી દડિયું,

ઘર, વાદળ ને છોડી ફળિયું,

ખળખળતું ધમધમતું ધરણી

અંકે કરવા ધાય

ઝરણું ઝાંઝરિયું

ફીણનાં ફોરે ફરફર ફોરાં

મારગ એના રહે ન કોરા,

પથરાયાં જ્યાં પ્રેમ પટોળાં

ઝિલણિયું હરખાય

ઝરણું ઝાંઝરિયું

નેહ નિતરતું, ઝીણું ઝરતું;

નટખટ નાનું નર્તન કરતું;

સરસરતી સરિતા થઇ સરતું

સમદરિયે સંતાય

ઝરણું ઝાંઝરિયું


કીર્તિદા બ્રહ્મભટ્ટ