વહાલા વેદાંતને...

વહાલા વેદાંતને...




આજ દિવસ મારો છે મુજને કોઇ ન રોકે ટોકે

વહાલ સહુ વરસાવે મુજ પર આજે થોકે થોકે



મમ્મી ઘરને શણગારે છે, દાદી કરે મીઠાઇ

દાદા મુજને લઇને ચાલ્યા દર્શન કરવા ભાઇ

કેક મજાની લાવી પપ્પા બોલ્યા ખાજે હોંકે



લો આવ્યા નાનાનાની ને સાથે મામામામી

માસામાસીને લેવાને દોડી બહેની સામી

દોસ્તારોની ટોળી ઘરમાં આવી હોંશેહોંશે



કાકાકાકીએ આવીને ટોપી પહેરી માથે

કેક કાપતાં વેંત જ સૌએ ફુગ્ગા ફોડ્યાસાથે

ફોઇફુઆએ ઊંચકી મુજને બેસાડ્યો ભૈ ગોખે



જન્મદિવસના દિવસે બીજો કોઇ દિવસ ના આવે

સૌના માટે હું જ એકલો સૌ મુજને બોલાવે

હરખ તણો નહીં પાર ને હું તો હસતો બન્ને હોઠે



કીર્તિદા બ્રહ્મભટ્ટ

૧૬/૧૧/૨૦૧૦