મિત્રો

મિત્રો

મેં પ્રત્યેક માર્ગે બનાવ્યા છે મિત્રો
કદી ક્યાંક કોઇ ઠરાવ્યા છે મિત્રો

હશે કોઇ એવાં ય સ્વપ્નો સૂતાં જ્યાં
નરી કલ્પનામાં ય આવ્યાં છે મિત્રો

મને મ્હાત કરવાને પાછળ પડેલાં
બધાં પ્રેમથી મેં હરાવ્યાં છે મિત્રો

હતો ક્યાંક એવોય ભૂલો પડેલો
મને સાથ દેવાને આવ્યાં છે મિત્રો

તમારી પ્રતીક્ષામાં જાગી રહ્યો છું
ને વાતો તમારી જ લાવ્યાં છે મિત્રો

વહી જાય છોને વખત આપમેળે
અમે તો નિરાંતે નિભાવ્યાં છે મિત્રો

મને છે સતત સીધું ગણવાની આદત
ને તેથી કદી ના ગુમાવ્યા છે મિત્રો

                                   કીર્તિદા બ્રહ્મભટ્ટ