દિવાળી આવી છે
ઝગમગ દીવા પ્રગટાવી દો દિવાળી આવી છે,
મમ્મી મીઠાઇ મંગાવી દો દિવાળી આવી છે.
નાના નાના ફટાકડા તો નાની બહેની ફોડે,
બોમ્બ અને રૉકેટ હું જોને ફોડીશ કાકા જોડે.
મને ફટાકડા લાવી દો દિવાળી આવી છે.
મમ્મી પૂરશે રંગોળી ને ફોઇબા ગૂંથશે તોરણ,
ઝગમગ ઝગમગ દીવડા વચ્ચે ઝળહળશે ઘર આંગણ.
આજ હવે ઘર અજવાળી દો દિવાળી આવી છે.
હોય ભલે ના ચાંદલિયો આકાશે નીરખવાને
ઝગમગતા આ જગની વાતો પૂછશે કાલ બધાંને.
રંગ રાતનો બદલાવી દો દિવાળી આવી છે.
ટમટમતા તારલિયા જોશે એકબીજાની સામે
આભ આપણું જઇ બેઠું શું ખોળે ધરતીમાને!
વાત એમને સમજાવી દો દિવાળી આવી છે.
'પર્વતની ટોચે'માંથી
કીર્તિદા બ્રહ્મભટ્ટ
Subscribe to:
Post Comments (Atom)
No comments:
Post a Comment