મમ્મીના કાનમાં
મારી મમ્મીના કાનમાં હું કહીશ કહીશ કહીશ
મને ઝાડ ઉપર ચડવા તું દઇશ દઇશ દઇશ
ઇંડા રૂપાળાં ને જોવાં છે માળા
અહીં તહીં ઝૂલીને ગણવાં છે ડાળાં
આભલાને અડવા હું ટોચ ઉપર જઇશ જઇશ જઇશ
મારી મમ્મીના કાનમાં હું કહીશ કહીશ કહીશ
ડુંગર ચડું ને હું કોતર કૂદાવું
કેડી વિના મારે દૂર દૂર જાવું
સંગ ઝરણાંની ગીત હું ય ગઇશ ગઇશ ગઇશ
મારી મમ્મીના કાનમાં હું કહીશ કહીશ કહીશ
વર્ષાના વારિથી મારે ભિંજાવું
ઝરમરતાં ઝરમરિયાં ઝીલી હરખાવું
એક મોરલાનો ટૌકો હું થઇશ થઇશ થઇશ
મારી મમ્મીના કાનમાં હું કહીશ કહીશ કહીશ
રોજ રોજ ઝાકળને જઇને અડવાનો
ફૂલ તણી ફોરમ હું લઇને ફરવાનો
પેલા વાયુની જેમ હું ય વહીશ વહીશ વહીશ
મારી મમ્મીના કાનમાં હું કહીશ કહીશ કહીશ
કીર્તિદા બ્રહ્મભટ્ટ
